“Müstəqilliyə aparan yol - Azərbaycan-Gürcüstan” rəsm və inşa müsabiqəsinin qalibləri mükafatlandırılıb
Azərbaycanın Gürcüstandakı səfirliyinin 20 Yanvar və 9 Aprel hadisələri ilə əlaqədar elan etdiyi “Müstəqilliyə aparan yol - Azərbaycan-Gürcüstan” adlı rəsm və inşa müsabiqəsinə yekun vurulub.
Yanvarın 22-də Azərbaycanın Gürcüstandakı səfirliyində müsabiqənin qalibləri ilə görüş keçirilib, onlara mükafatlar təqdim olunub.
Mərasimdə Gürcüstanın xarici işlər nazirinin müavini Aleksandre Xvtisiaşvili də iştirak edib.
Azərbaycanın Gürcüstandakı səfiri Faiq Quliyev müsabiqənin əhəmiyyətindən danışıb, yarışda iştirak edənlərə təşəkkürünü bildirib. O, hər iki xalqın müstəqillik yolundakı mübarizəsindən, bu yolda baş verən qanlı hadisələrin tarixindən və nəticələrindən danışıb.
Bildirib ki, müstəqilliyimizin bərpası ilə nəticələnən hər iki hadisə Azərbaycan və Gürcüstanda milli kimliyin formalaşmasına zəmin yaradıb. Şəhidlərin qanları hesabına əldə olunmuş müstəqillik əbədi və dönməzdir.
Gürcüstanın xarici işlər nazirinin müavini Aleksandre Xvtisiaşvili müsabiqənin təşkilinə görə Azərbaycan səfirliyinə minnətdarlığını bildirib.
Nazir müavini deyib ki, dövlət müstəqilliyi uğrunda şəhid olanlar böyük fədakarlıq göstəriblər, onların xatirəsi əziz tutulmalı və yaşadılmalıdır.
O, müsabiqə iştirakçılarını və qalibləri təbrik edib, bu cür tədbirlərin təşkilinin gənc nəslin milli ruhda böyüməsində mühüm rol oynadığını vurğulayıb.
Müsabiqəyə hər iki nominasiya üzrə 52 iş təqdim olunub. İlk üç yeri tutan iştirakçılara diplom və hədiyyələr, müsabiqənin iştirakçılarının hamısına təşəkkürnamələr, fərqlənən işlərə görə isə sertifikatlar verilib.
